Lain -laing Klase sa Konduktor

Init, Alimuot. Huot. Abog. Aso.

Mao ni ang kasagarang reklamo ug yangu-ngo sa usa ka pasahero. Usa ko na ko didto.

Ang pagbiyahe nikao’g dakong oras sa akong adlaw-adlaw na pag-eskwela. Apan gibusog sad ko niinig mga ideya ug panghitabo, ug labaw sa tanan, pagtulun-an nga tagsa ra nako makitang gihukad sa eskwelahan.

Atong estoryahan karun kay ang mga konduktor.

Kadaghanan sa akong masakyan nga mga jeepney naay mga konduktor. Wala pa nuon ko kasakay ug jeep nga wa’y drayber.

Konduktor.

Ang kaabag sa drayber sa pagpanawag ug pasahero, ang tigdawat sa imong plite ug tigsukli sa imong tibuok usa ka gatos ka pisos nga bisag sa kadako sa nagbandera nga “sinsilyo lang sa buntag” imo gihapong gihatag. (Hinuon di ka kabasol sa mga pasahero nga mutunol ug tibuok kay ang mga sinsilyo mapundok man sa mga Automatic Tubig, Kape, Choco Drink at iba pa Machines nga nagkatag sa mga tindahan daplin sa karsada. Not to mention video karera’s and the like.)

Konduktor.

Ang tigtuktok kung naay munaog. Ang musenyas sa luyo ug de-mano arun sakyanan makapwesto. Ang magtan-aw kung puno na ba ang jeep arun byahe diretso.

Konduktor.

Lain-lain ug pamorma. Lain-lain ug hirit nga linya.

Mao ni ang mga Lain-laing klase sa konduktor:

1.  Konduktor nga teacher –kung maningil sa plite:  “ok, pass your papers, finished or unfinished.”

2.  Konduktor nga pulis – “itugyan na na, wala na mo’y mahimo.”

3.  Konduktor nga photographer – basta naay munaog: “ato sang tarungon ug pose, para nindot ug kuha.”

4.  Konduktor nga double meaning – bisag puno na, muhirit pa jud “bi sikit-sikiti bi, luag pa ka ka’y na. kada adlaw na gigamit.”

5 . Konduktor nga closet gay – “palihug ta’g sikit sa tuhod bi. Ang magbilangkad hikapon ang itlog.”

6.       Konduktor nga CAT corps-commander – kanang igsyagit, hadlok tanang pasahero. Sir yes sir!

7.      Konduktor na babaye – kasagarang maglingkod sa front seat o di ba kaha sa kinaluyuhang bahin sa jeepney. Kasagarang magdala’g bag or kahon para sudlan sa sinsiyo.

8.      Konduktor na bossy – kanang magbuot sa drayber kung mu-desilya (turn left) ba o mu-dimano (turn right). Kanang muingon ug ‘lahos’ bisa’g trapik.

9.       Konduktor na bata – kita ko’g ingun ani sa jeepney na may rutang SM-Liloan.

Mas imba.

10  Konduktor na singko sa math – kanang maglisod ug di kahibaw’ng musukli ug insakto.

*pangutana – nganu diay’ng kasagaran sa mga pasahero basta kuwang ang sukli, mureklamo; kung sobra, hilumon kaayo? Hmm

11. konduktor na shy – di hapit mutingog. Ang drayber na lang ang manawag sa pasahero. Tigdawat ra sa plite.

12. konduktor na chansing – kanang inig padung sakay sa pasaherong babay, hikapon ang buko-buko. Kung laki, wa jud, pasagdan ra. Haha

13. pseudo- konduktor – kanang random stranger na mukapyot sa jeepney na walay konduktor nya manawag dayu’g pasahero. Ig abot sa sunod-eskina, wagtang na. astang plite.

14. konduktor na friendly – kanang jamming kaayo.  Usahay di pa ka paplitehon.

15. konduktor na aktibista – while nag sukli, ce’g yawyaw sa kabati sa atong panggamhanan, kung unsa ka corrupt ang mga politiko. STP!

16. konduktor na FC – basta naay gwapa nga nisakay, tuparan dayun ug char-charan.

17. konduktor nga adik – kanang puwa kaayong mata, nya kung imong storyahan, deadma. Kung manaug naka, nya muyamar nga ka sa imong sukli masuko kay nganung wa naningil daan. Tsk.

18. konduktor na Charo Santos – kanang mustorya sa iyang mga kaagi sa kinabuhi sa mga random na pasahero labi na’g naglingkod ka duol sa luyo.